Que é

O proxecto DESQOOP. “Desenvolvemento rural transfronteirizo de base cooperativa, Galicia–Norte de Portugal” está conformado por un programa de execución plurianual 2006–2007, deseñado para o fomento do desenvolvemento rural, dende a promoción empresarial e comercial do cooperativismo e dos seus factores de competitividade, calidade e ampliación de mercados.

Con este propósito, DESQOOP asocia a 9 entidades de natureza pública e privada, sen ánimo de lucro, das dúas zonas, cun orzamento financiado nun 75% por FEDER (Fondo Europeo de Desenvolvemento Rexional) – UE, que permitirá a consecución dos seus obxectivos e a execución das inversións en infraestruturas contidas no proxecto.

A área xeográfica de intervención, zona interior Galiza–Norte de Portugal, posúe unha economía baseada fundamentalmente na actividade empresarial do sector agroalimentario, as industrias locais e a produción artesá de carácter tradicional. A situación económica da zona plantexa a necesidade de elaborar estratexias de promoción empresarial en consonancia con políticas de desenvolvemento territorial, que teñan en conta o cooperativismo e as sinerxías económicas da zona transfronteiriza.

COMPLEMENTARIEDADE COAS POLÍTICAS REXIONAIS

DESQOOP deséñase en coherencia coas principais análises e conclusións do DOCUP INTERREG III – A Programa Galicia – Norte de Portugal, as prioridades establecidas polo Plan Nacional de Acción para o Emprego, PNAE, e o Plan de Acción para o Emprego de Portugal, referidas á creación de emprego vinculado ao desenvolvemento territorial local e rexional, en concreto:

1. Plan Estratéxico do Cooperativismo Galego (2004).

Nas súas orientacións para a promoción e mellora empresarial e da área sectorial agraria:

• Aproveitamento de potencialidades cooperativas polas estruturas de Desenvolvemento Local.
• Fomento do cooperativismo agrario e estratexia de competitividade: calidade e trazabilidade, comercialización de producións agrarias e ampliación de mercados.
• Autoemprego e servizos de incubación.
• Observatorios cooperativos.

2. CCDR – N de Portugal
Define como prioridade para a rexión "a valorización das potencialidades rexionais, en particular, aquelas que esixen unha actuación concertada, en áreas como a creación de emprego e o reforzo da capacidade institucional. Actuacións integradas de base territorial que se coordinen coas políticas sectoriais e apoio para a competitividade de clústers rexionais”.

ÁMBITO XEOGRÁFICO

A rexión transfronteiriza Galicia–Norte de Portugal, suma un espazo físico de 51 km², cunha poboación de 6,3 millóns de persoas, que representa o 13% da Península Ibérica.

Posúe un nivel de renda inferior ao 75% da media comunitaria. A área de intervención conta cunha tradición histórica e cultural común, xeografía e idioma moi semellantes, que favorece a interrelación dos seus habitantes e actores económicos. Estas similitudes atópanse tamén no mapa económico, onde, en grandes liñas, prodúcese unha situación de bonanza e despegue económico para a zona litoral, contrarrestada polo atraso e déficits estruturais da zona interior aos dous lados da fronteira. Será neste último espazo onde se centran os esforzos de promoción empresarial cooperativa das entidades asociadas neste proxecto:

NUTS III GALICIA:
Ourense, Pontevedra, A Coruña.

NUTS III NTE. PORTUGAL:
Alto Tras–os–Montes, Cávado, Grande Porto.

DESQOOP parte da consideración de que dende o cooperativismo é posible potenciar unha meirande interacción transfronteiriza dos actores sociais e económicos. En concreto, a elección da área xeográfica de actuación fundaméntase na importancia e potencialidade da actividade cooperativa dos municipios seleccionados para o desenvolvemento empresarial e comercial cooperativo na área rural.

A complementariedade da actividade económica cooperativa existente indica o interese dos mercados para as empresas locais, así como de incentivación das actividades de cooperación empresarial que contribúan a unha redución de custes no relativo á merca de subministracións e ao achegamento das redes de distribución do sector agroalimentario e industrias tradicionais da zona.

O recente incremento das relacións transfronteirizas de tipo social e político entre os municipios da zona, así como a mellora nas infraestruturas de comunicación, asociadas á forte presenza de empresas cooperativas na zona, poden facilitar a execución deste proxecto piloto na promoción e dinamización das relacións empresariais e económicas dende o ámbito da economía social. Este obxectivo fai necesaria unha intervención integral en materia de desenvolvemento territorial e rural.